ИСТАНБУЛ (АА) – Новоизбраниот американски претседател Доналд Трамп го угости извршниот директор на Мета, Марк Закерберг, на вечера во неговото одморалиште Мар-а-Лаго во Флорида, објави „Си-би-ес њуз“, пренесува Анадолу.
Средбата ги спои поранешниот претседател, кој претходно беше забранет од таа платформа, и основачот на Фејсбук.
Портпаролот на Мета за „Си-би-ес њуз“ ја потврди вечерата, велејќи дека Закерберг е благодарен за поканата и можноста да се сретне со членовите на тимот на Трамп во администрацијата што доаѓа.
Стивен Милер, назначен за заменик-шеф на кабинет за вториот мандат на Трамп, исто така рече дека Закерберг, како и другите бизнис-лидери, сака да ги поддржи економските политики на Трамп.
„Марк, очигледно, има свој интерес, има своја компанија и има своја агенда“, рече Милер во интервју за „Фокс њуз“.
„Но, тој јасно стави до знаење дека сака да ја поддржи националната обнова на Америка под водство на Трамп“, додаде тој.
Извор: Anadolu Agency (AA)
