Во периодот од 14 до 28 јули Грција беше соочена со топлотен бран во две фази, што според податоците на Националната опсерваторија во Атина и порталот Метео, беше ден од најдолгите топлотни бранови регистрирани во земјата со екстремно високи температури, а претходните два најдолги биле во изминатите три години, јави дописничката на МИА од Атина.
Топлотниот бран траеше 13 дена, првата фаза од 14 до 17 јули, втората и посилната од 20 до 28 јули, додека пак краткиот дводневен период од 18-19 јули меѓу двете фази температурите беа близу до нормалните нивоа за сезоната.
Најтоплиот ден во Грција беше 25 јули, кога, според Метео, речиси целото население беше погодено од температури повисоки од 40 степени.
Поконкретно, 362 од вкупно 560 метеоролошки станици ја надминаа границата на топлотниот бран со максимална температура над 37 степени, а 167 станици надминаа 40 степени Целзиусови.
Истиот ден била измерена и највисоката температурна за летово, 45,8 степени во Скала на Пелопонез и е за само 0,6 степени пониска од рекордно високата температура измерена во Грција, пред две години во Гитио, исто така на Пелопонез, кога во јули 2023 година изнесуваше 46,4 степени Целзиусови.
Во областа Атика, поширокиот регион на Атина, поради топлотниот бран дури 80 отсто од вкупните часови во период од девет дена (од 20 до 28 јули) температурата била еднаква или над 30 степени Целзиусови, што, како што пишува Метео, значи дека дури и во текот на ноќта температурата не успеала да падне под 30 степени.
Извор: kurir.mk
