Девојчињата биле во спалната соба без родителски надзор, кога тригодишното девојче пронашло наполнет полуавтоматски пиштол и испукало еден куршум кон својата сестра, рекол шерифот на округот. Девојчето починало на самото место
Тригодишно девојче пронашло наполнет пиштол во својот дом во Тексас и случајно ја застрелало својата четиригодишна сестра. Девојчето починало, пренесува Си-би-ес.
Шерифот на округот Харис Ед Гонзалес изјави дека инцидентот се случил вчера околу 20 часот и дека девојчињата биле во спалната соба во станот во Хјустон каде што живееле со своите родители. Со нив живееле и други членови на семејството.
Девојчињата биле во спалната соба без родителски надзор, кога тригодишното девојче пронашло наполнет полуавтоматски пиштол и испукало еден куршум кон својата сестра, рекол шерифот.
Откако го слушнале истрелот, родителите се упатиле кон спалната соба и го нашле четиригодишното девојче на подот. Девојчето починало на самото место. По инцидентот семејството веднаш повикало полиција и брза помош.
Окружното обвинителство на округот Харис по истрагата ќе одлучи дали некој од родителите или другите членови на семејството ќе се соочат со обвиненија. Истрагата сè уште е во прелиминарна фаза, рече шерифот.
„Кога детето ќе го загуби животот на овој начин, заедницата е засегната. Оваа трагедија е една од многуте што можеше да се избегне. Продолжуваме да испраќаме порака дека ова може да се спречи. Мора да бидете одговорен сопственик на пиштол и мора да го чувате на безбедно место. Тоа е повеќе од кажување на малите деца да не допираат пиштоли. Мораме да направиме малку повеќе. Има премногу вакви трагедии“,
рекол шерифот Гонзалес, пренесува Си-би-ес.
Фото: Илустрација / EPA-EFE/AARON M. SPRECHER
Извор: 360stepeni.mk
