Околу еден час траеше сослушувањето на поранешниот претседател Доналд Трамп во судот во Вашингтон , каде тој за првпат се соочи со федералните обвиненија за обид да ги поништи изборните резултати во 2020 година. Како што пренесуваат странските новинари кои го следеа судењето, Трамп се изјаснил за невин по сите точки од обвиненијата.
Трамп беше условно ослободен, а меѓу условите е да нема контакт за случајот со ниту еден сведок, освен ако не се присутни адвокати, пренесува Асошиејтед прес.
„Доколку не исполните какви било услови за вашето ослободување, може да биде издаден налог за ваше апсење“,
рече судијката на сослушувањето.
Следното сослушување е закажано за 28 август, кога се очекува да биде утврден датумот за почеток на судењето. Специјалниот обвинител Џек Смит рече дека барал „брзо судење“ кога ги објави обвиненијата во вторникот, пренесува Би-би-си.
Според медиумите, Трамп го напуштил судот од задната врата заедно со својот правен тим. По заминувањето од судот тој се упати кон аеродромот каде го чекаше приватниот авион со кој претходно слета од неговиот дом во Њу Џерси.
Во изјава за медиумите, без можност за новинарски прашања , на аеродромот Трамп порача дека денес е тажен ден за Америка, а обвиненијата ги оцени како „прогон на политички противник“.
„Ова е многу тажен ден за Америка, а исто така беше многу тажно и возењето низ Вашингтон да ја гледате целата нечистотија. Ова не е местото кое јас го оставив“,
рече Трамп.
Во обвинението тој се соочува со четири точки вклучувајќи заговор за измама на САД, манипулација со сведок и заговор против правата на граѓаните, поврзани со нападот на Капитол на 6 јануари 2021.
Трамп веќе се соочува со два други кривични случаи додека тој води кампања за Белата куќа за догодина. Но, случајот поврзан со изборниот процес се смета за најсериозен од сите.
Извор: 360stepeni.mk
