Еден од лидерите на коалицијата ВЛЕН и актуелен министер за здравство, Арбен Таравари, изрази осуда за чинот на палење знамиња, нагласувајќи дека ваквите постапки не треба да се толерираат, без разлика на етничката или националната припадност.
Во изјава за медиумот „ЛАЈМ“, Таравари истакна дека Владата презема конкретни чекори за санкционирање на сите кои го нарушуваат законот. Тој нагласи дека за првпат во Македонија лице е уапсено за палење на албанското знаме, што е јасен сигнал дека нема да има толеранција за вакви инциденти.
„Ова е непријатна ситуација од двете страни. Палењето на знамето, без разлика дали станува збор за етникум, држава или нација, е неприфатливо. Владата испрати јасни пораки до сите. Во Прилеп, за првпат во историјата на Македонија, лице кое го запали албанското знаме е уапсено. Истовремено, и лица кои го запалија државното знаме се лишени од слобода. Ова покажува дека сите мора да ги почитуваме симболите, меѓусебно да се почитуваме и да ги следиме законите“, изјави Таравари.
Тој ги повика граѓаните, без разлика на нивната етничка припадност, да покажат почит и одговорност, бидејќи Владата ќе реагира подеднакво кон сите. „Законот мора да важи за сите“, додаде министерот.
ИЗВОР: ТВ 21
