Таравари со лидерите на ЕСП на средба со Курти? – Сите ја чекаат одлуката на АА

2023 година изминува, а на албанската политичка сцена не можеме да кажеме дека има јасност за начинот на кој политичките партии ќе учествуваат на претстојните мајски избори. Освен што Движење Беса, Демократското движење и Алтернатива се приклучија како заедничко тело, останатите партии сè уште не одлучиле како ќе настапат на изборите, вклучително и ДУИ. Последните повици на ДУИ беа да се формира Европски фронт кој ќе излезе како победник на изборите во мај. Овој повик го упати и СДСМ.

Што се однесува до АА, ниту оваа партија се уште нема донесено одлука како ќе учествува на изборите. И ДУИ и Европскиот сојуз за промени повикаа на коалиција. А за таа цел, како што дознава ТВ21, вчера, на иницијатива на првиот човек на Самоопределување, Албин Курти, во Приштина била одржана заедничка средба меѓу Арбен Таравари, Изет Меџити, Африм Гаши и Биљал Касами.

Движењето Самоопределување на парламентарните избори ќе биде дел од изборните листи со Европскиот сојуз за промени, додека нивниот претставник Беким Ќоку ја повика и АА да им се придружи.

„Ги поканувам и другите политички партии, граѓанското општество, а овде отворено ја поканувам и Алијанса за Албанците да се приклучи на оваа промена бидејќи јас како поранешен член на Алијанса го чувствувам и знам менталитетот и опозицискиот дух на Алијанса и знам дека таа има свое место во оваа постава овде“, вели Беким Ќоку.

И лидерот на Движењето Беса, Биљал Касами, ја повика АА да се приклучи.

„Затоа, уште еднаш ја користам приликата во врска со анкетите, да ја поканам АА, за што поскоро да реши да биде таму каде што е нејзиниот гласач, тоа најдобро го знае раководството на АА. Гласачот на АА не оди со ДУИ, тие можат да одат но гласачот ќе биде со опозицијата“, порача Биљал Касами.

Првиот човек на ДУИ, Али Ахмети, по последната средба со Таравари изјави дека сите опции се отворени, додека конечната одлука ќе ја донесат партиските органи.

„Опциите се отворени, многу пријателски разговор, ќе продолжиме повторно да се среќаваме. Ќе разговараме за опциите, визиите, случувањата и врз основа на оценките што ќе ги дадат партиските органи ќе донесеме и одлуки како и за која опција ќе се одлучиме“, вели Али Ахмети.

Она за што досега се изјаснија од Алијанса за Албанците е дека волјата на централното претседателство е сами да одат на избори, додека првиот човек на оваа партија Арбен Таравари на последната средба со Ахмети во Гостивар рече дека тешко АА да оди на заеднички листи со ДУИ.

„Реков, многу е тешко за Алијанса да излезе со ДУИ, но пак ќе разгледаме. Мора да се почитуваат одлуките на партиските органи“, порача Арбен Таравари.

Уморен од повиците за коалиција, генералниот секретар на АА пред неколку дена изјави дека никој нема право да и каже на АА кога и како ќе одлучува за својата политичка иднина.

Што се однесува до новоформираните партии, Народно движење и Европската демократска партија, ниту една нема конечна одлука како ќе постапи. Нивниот услов, како што изјавија досега, е партиите со кои ќе коалицираат да ги делат истите вредности во однос на европскиот пат на земјата.