Британскиот премиер Риши Сунак ќе договори поблиски одбранбени и безбедносни врски со францускиот претседател Емануел Макрон кога ќе се сретнат денеска во Париз и ќе се заложи за поголема соработка за поддршка на Украина и во индоевропскиот регион.
Сунак патува во Париз со неколку министри на самит што ги опфаќа и миграцијата и енергетиката, а двете земји се обидуваат да ги поправат билатералните врски што претрпеа оштетувања по излегувањето на Велика Британија од Европската унија.
Руската инвазија на Украина ги зајакна британско-француските врски и пред состанокот, кабинетот на Сунак објави дека Велика Британија и Франција ќе ја координираат испораката на оружје за Украина и обуката на украински војници. Тие, исто така, ќе разговараат за воспоставување постојано европско поморско присуство во Индо-Пацификот и за развој на високопрецизно оружје од новата генерација за зајакнување на капацитетот на НАТО.
Велика Британија најави дека ќе биде домаќин на состанокот на Европската политичка заедница следната година – група предложена од Макрон за продлабочување на европската соработка по руската инвазија на Украина пред една година.
Сунак, исто така, рече дека сака да се справи со „неправдата на илегалната миграција“ додека се обидува да оди понатаму со Франција во запирање на малите чамци кои стигнуваат до јужните брегови на Англија преку Ла Манш.
Во ноември, Велика Британија и Франција потпишаа договор вреден 72,2 милиони евра за зајакнување на напорите да се запрат илегалните мигранти на опасното патување, а оваа недела Велика Британија го претстави новото законодавство за справување со ова прашање.
Во однос на енергетската безбедност, Сунак и Макрон ќе разговараат за тоа како да се обезбедат посигурни и поевтини извори на енергија.
ИЗВОР: kurir.mk
