Иако доаѓаат од различни држави, студентите од регионот се соочуваат со слични проблеми. За да зборуваат за нив и да побараат решенија за предизвиците со кои се соочуваат, младите се собраа во Скопје на вториот студентски форум. Студенти од Македонија, Албанија, Косово и Србија потпишаа заедничка декларација, која според Бленди Ходаи од Форумот за промени во образованието, има за цел да изврши притисок за забрзување на процесот на усогласување на дипломите од универзитетите во Западен Балкан, што е дел од Берлинскиот процес.
„Потоа ќе се гласа и за студентската резолуција, каде една од клучните точки е барањето до институциите во Македонија да се формира независен инвестициски фонд за образование, кој нема да биде финансиран само од Министерството за образование, туку и од други спонзори, со цел да се постигне поголема финансиска еднаквост меѓу универзитетите и високото образование во земјата.“, вели Бленди Ходаи од Форум за промени во образованието.
Претставниците на студентските организации од земјите од регионот ја истакнаа важноста од останување поврзани и заедничко делување за унапредување на квалитетот во високото образование и борбата против корупцијата и нетранспарентноста.
„Нашата идеја е заеднички не само да споделуваме различни идеи, не само да се поврзуваме културно, туку и да продолжиме со унапредување на нивото на високото образование и пошироко. Верувам дека обединувањето носи сила не само меѓу организациите, туку и меѓу државите.“, изјави Адриатик Луљиќи, извршен директор на „United youth task force“ во Косово.
„Тоа што е важно, што сега се случува во Србија, е една нова енергија, каде што студентите на некој начин го преземаа водството над народот, за државата да се води како што треба и ми се допаѓа што таа енергија се пренесува и во другите држави од регионот и Европа.“, вели Лазар Беговиќ, претседател на институтот за младински активизам и диверзитет Србија.
–Знаејќи дека студентскиот живот има многу проблеми, ваквите иницијативи покажуваат дека студентите секогаш се тука за да покажат како нештата што секојдневно ги прифаќаме како нормални, всушност се многу кревки, и како можеме секогаш да им се спротивставиме за да го подобриме нашиот и животот на целата заедница-рече Јан Кола, граѓански отпор Албанија.
Ова беше вториот студентски форум, што се одржа во текот на два дена, со различни говорници кои дискутираа за теми што главно ги засегаат младите. Овогодинешниот настан се одржа под мотото: „Стани. Подигни се. За нашите права. Едни за други. За иднината што ја заслужуваме.“
ИЗВОР: ТВ 21
