Веста дека од еден донор утринава се спасени четири животи ја соопштија од Министерството за здравство. Првпат во историјата на македонското здравство, велат од оттаму, од еден дарител беа експлантирани четири органи во еден акт
Четириесетгодишен пациент од Скопје рано утринава доби ново срце, а шанса за живот добија уште три пациенти кои ќе добијат органи од починат дарител.
Веста дека од еден донор утринава се спасени четири животи ја соопштија од Министерството за здравство.
„Благодарение на хуманоста на едно семејство, нивната љубов, добрина и емпатија која ја носат во себе, ново срце почна да чука во градите на 40-годишен пациент од Скопје. Нова шанса за живот и црн дроб доби пациент со хронична црнодробна болест, а двајца пациенти на дијализа во текот на денот ќе добијат бубрези“,
соопштија од Министерството за здравство.
Дополнително, шанса за поквалитетен живот ќе добијат и пациенти со коскени заболувања.
Првпат во историјата на македонското здравство, велат од Министерството, од еден дарител беа експлантирани четири органи во еден акт.
Оттаму зразуваат благодарност до семејството на починатиот донор за, како што велат, несебичната одлука која донесе утро полно надеж и верба за безусловна добрина, а благодарност изразија и до медицинските екипи кои изминатите 24 часа работеа и сè уште работат на скопските хируршки и интерни клиники.
„Горди сме на секој нов успех во македонското здравство“,
велат од Министерството.
ИЗВОР: 360stepeni.mk
