На граничниот премин Табановце утринава владееше вистински хаос – километарски колони, нервозни возачи и чекање под жешкото сонце предизвикаа револт кај патниците, особено кај оние кои транзитираат од Србија кон Грција и обратно.
Српските туристи на социјалните мрежи споделуваат фотографии и видеа на кои се гледаат долги редици од возила, некои и по неколку километри, со коментари дека чекањето траело повеќе од два часа. Според нив, гужвите се резултат на зголемен туристички сообраќај во шпицот на летната сезона, но и на бавните процедури при пасошката и царинската контрола.
„На 40 степени да стоиме вака е ужасно. Малку повеќе шалтери или подобра организација би го намалила хаосот,“ напиша еден патник на „Фејсбук“.
Од македонската гранична полиција велат дека се работи со зголемен број екипи, но дека протокот на возила е забавен и поради дополнителните безбедносни проверки во согласност со европските регулативи. „Се прават напори да се забрза преминот, но во пикови од ваков тип, гужвите се неизбежни,“ наведуваат од МВР.
Табановце е еден од најфреквентните гранични премини на Западен Балкан, преку кој летно време поминуваат илјадници возила дневно. Туристичките агенции предупредуваат патниците да тргнуваат порано, да носат доволно вода и да бидат трпеливи, бидејќи слична состојба се очекува и во наредните викенди.
ИЗВОР: racin.mk
