Србија е уморна од блокади и протести, рече пред пратениците во своето експозе како мандатар на новата влада во Србија Ѓуро Мацут. Рече дека главната задача е институциите на системот да функционираат со полн капацитет, дека неговите врати ќе бидат отворени 24 часа на ден, седум дена во неделата, а од новите министри побара да бидат повеќе со народот.
„Всушност, идејата и повикот да бидам носител на мандат е можеби визионерски момент кој треба да го привлече нашето општество кон една кохезија и да излеземе од ова што е можно побрзо и поефикасно и да се обидеме да ги решиме проблемите што се појавија сега, преку институциите.“ – Ѓуро Мацут мандатар.
Жељко Веселиновиќ, од „Работничкото движење “, рече дека владата за која се гласа не се смета за нова влада, туку за реконструирана која претседателот ја најави пред шест месеци.
„Клучните министерства ги задржуваат истите луѓе. Некои имаат ротирани позиции. Не знам ништо за Мацут, но ми е жал што ќе изгубиме добар лекар и ќе добиеме политичар кој ќе биде успешен или неуспешен. Добар лекар во политичката кал може да биде злоупотребен. Не сум сигурен колку можности ќе имате да се искажете тука.“ – Жељко Веселиновиќ „Работничкото движење“.
Составот на владата не е особено значаен, бидејќи претседателот Вучиќ ги носи сите одлуки, но од друга страна, кога на чело на Владата става сосема анонимно лице, мислам дека тоа е доволно за да се знае како ќе изгледа оваа влада, вели професорот Душан Спасојевиќ од Факултетот за политички науки.
„Кога тој поставува сосема анонимно лице на чело на владата, мислам дека тоа е доволно за да знаеме како ќе изгледа оваа влада. Ова не е личност која може да испрати порака за помирување.“ – Душан Спасојевиќ Факултет за политички науки.
Додека се одвиваше расправата во српското Собрание, пред зградата на Радио-телевизија Србија во центарот на Белград и кај студиото на Кошутњак се протестираше од студентите во блокада, а дел од вработените не можеа да стигнат до своите работни места. Студентите бараатда се објави јавниот повик за избор на членови на Советот на регулаторното тело за електронски медиуми.
Студентите кои ги блокираа влезовите во зградата на Радио-телевизија Војводина претходно се разотидоа откако жандармеријата поставо кордон, со што на вработените им е дозволен влез во зградата.
Извор: 24vesti.mk
