Неделата на независна сцена во Драмскиот театар од Скопје ќе почне на 14 јануари со претставата „Еволуција на распадот“, работена по „Отело“ од Шекспир, во продукција на „Артема – театарска лабораторија“. Режијата е на Дамјан Димовски, а играат Илин Јовановски како Јаго, Бранко Михајлоски како Отело, Дездемона е Леонида Гулевска, Емилија е Илина Чонкова, Касио е Тодор Стојковски, Родриго е Ѓорѓе Нешковиќ. Музички соработник е Дарко Спировски.
Од Драмски театар велат дека за гостувања ги отстапуваат сцената „Ристо Стефановски“ и Малата сцена на театарот како и потребната техника со што овозможува „изведба на новите претстави и презентирање на иновативни, автентични и квалитетни театарски проекти“. На сцените на Драмски театар од 14 до 18 јануари ќе се изведат пет претстави во продукција на пет ансамбли од независната сцена. Сите претстави почнуваат во 20 часот.
На 15 јануари со претставата „Безвремени приказни“ на продукција „Независна“ ќе се претстават Исидор Јованоски, Ана Левајковиќ-Бошков, Хакан Даци и Нела Павловска. Кореографијата е на Ирена Лозинска. Станува збор за перформанс со карактер на танцов тетар што обработува теми од Франц Кафка. Доријан Миловановиќ направи видео арт за перформансот, а музички соработник и композитор на претставата е Енес Беговски.
Со претставата „Среќен мртовец“ на 16 јануари ќе се претстави продукцијата „Алтернативен Театар Отпишани – Скопје“. „Среќен мртовец“ е сатирична драма за живиот мртовец Живко. Автор е Марјан Анѓеловски, режијата е на уметничката екипа, а играат Благој Чоревски, Ирена Илиевска, Марија Лазарова, Ивана Стамевска, Огнен Велевски, Кирил Трајковски Максим и Јасмин Рамани.
На 17 јануари со претставата „Казабалкан“од Горан Стефановски, во режија на Дамјан Костовски ќе настапи актерската екипа Мирјана Трпковска-Костовска, Владимир Петровиќ, Горан Ников, Јана Вељановска, Васко Костовски, Марина Поп Панкова, Христијан Поп-Симонов, Теоман Максут и Саша Димитриевска. Продуцентка и сценографка е Екатерина Николовска, костимографка е Екатерина Добривојевска, а композитор е Бојан Филиповски.
Продукцијата на Театар „Златен Елец“, годинава во Драмски театар ќе настапат со претставата „Добри луѓе“ на 18 јануари. Адаптацијата и режијата се на Тамара Стојаноска. Станува збор за дуодрама работена според текст на Данкан Мекмилан, преводот е на Наташа Пеевска. Играат актерите Тијана Трајчевска и Филип Христовски. Музиката е на Ива Дамјановски.
Билетите за гостувањата на независната сцена од 14 до 18 јануари се пуштени во продажба.
„Со поддршката на независната сцена Драмски театар иницира создавање на силна мрежа на театарската заедница од различни генерации актери, режисери, драматичари, сценографи, костимографи и мултимедијални уметници. Неделата на претстави од независната продукција е замислена како платформа за контакти на уметници кои внесуваат свежина, динамика, понекогаш и неконвенционален пристап во процесот на создавање на театарските претстави, што може да води до идни соработки, копродукции и проекти“, велат од Театарот.
Б. НЕСТОРОСКА
ИЗВОР: sdk.mk
