„Главната расправа е завршена, можете да си одите, слободни сте“.
Амнестијата важи. Првостепено осудените за терористичко загрозување на уставниот поредок и безбедност по пет години кажаа збогум на судот. Судијата Илија Трпков рече дека останатите осудени за настаните од 27-ми април 2017 година треба да се срамат, да ја наведнат главата и побараат прошка од државата оти биле изманипулирани. Ова следува откако Кривичниот суд го прифати барањето за амнестија и ги ослободи од натамошнот гонење лицата за кои обвинителството тврди дека се организатори на настанот.
„На крајот ќе произлезе дека осудените лица за настаните од 27 април, 2017 година сами се организирале и сами размислиле дека треба да влезат во Собранието и да кршат и тепаат. На сите ни е јасно, но и на осудените лица дека тоа не е така дека некој ги организирал за да влезат во Собранието. Не може да се случи да се пробие полициски кордон на кошаркарски натпревар, а не на полициски кордон пред Собранието пред кое повеќе денови се протестираше и полицијата беше подготвена за интервенција“, додаде Илија Трпков.
Инаку, судијата Трпков досега во два наврати одлучуваше дека амнестијата не ги опфаќа овие обвинети, но Апелација бараше и по трет пат да се произнесе, а ситуацијата дополнително доби друг тек откако Обвинителството за гонење на организиран криминал во декември даде позитивно мислење. Иако, обвинителството даде позитивно мислење само во однос на Вељаноски, Јанакиески и Ристоски, но не и за Атанасовски, судот одлучи сите четворица да бидат амнестирани од натамошно гонење.
„Некој ќе каже дека случајот со организаторите за настаните во Собранието паднал, па сега дека треба да се ревидира и другиот предмет со настаните во Собранието. Но, тоа не е така. Напротив предметот ниту паднал, ниту се докажа дека настаните во Собранието не се организирани, туку се побара милост од државата за овие настани“, вели Илија Трпков.
Адвокатот Јордан Апостолски по рочиштето рече дека случајот е политички монтиран и повика да се најдат вистинските организатори.
Судската постапка против четворицата обвинети се водеше по вторпат, сите беа обвинети за терористичко загрозување на уставниот поредок и безбедноста. Во 2021 Кривичниот суд ги осуди на 6 до 6 и пол години затвор сите четворица обвинети.
Во упадот во Собранието беа повредени пратеници, новинари, но и демократијата на една кревка држава која со години стои пред портите на Европската унија и бара влез во европското семејство.
ИЗВОР: ТВ 21
