Словачкиот премиер Едуард Хегер поднесе оставка

Словачкиот премиер Едуард Хегер ja доставил својата оставка до претседателката Зузана Чапутова, по долготрајната политичка криза, пренесе Ројтерс.

„Побарав од претседателката да ми го одземе мандатот. Ќе оставам на претседателката да се обиде да ја доведе Словачка на слободни и демократски избори со привремена влада“,

изјавил Хегер, кој е на чело на преодната влада од декември.

Хегер порачал и дека сите негови одлуки ќе бидат усогласени со Чапутова, со која ќе се сретне во текот на денот.

Претходно министерот за земјоделство Самуел Влчан во четвртокот ја објави својата оставка откако беше откриен случај во врска со субвенција од 1,4 милиони евра доделени на неговата компанија. А следниот ден и министерот за надворешни работи Растислав Качер изрази желба да ја напушти владата, но не ги прецизираше причините за неговата одлука.

Хегер беше на чело на привремената влада од 15 декември кога словачкиот парламент изгласа недоверба на коалициската влада и требаше да остане до одржувањето на новите избори.

Неодамна политичката криза се продлабочи во Словачка, земја со 5,4 милиони жители, членка на Европската унија и НАТО.