Следната недела „Трикафта“ пристигнува – Меџити: Лекот не е поскапен, 12 пациенти примаат терапија

Министерот за здравство Фатмир Меџити вели дека не се вистинити информациите дека е поскапен лекот Трикафта за 250 илјади денари по пациент. Додава дека како Министерство за здравство, Фондот за здравствено осигурување и јавните набавки се дало согласност до Клиниката за детски болести да ја изврши целокупната набавка за да се добие на време, да биде од итност и побрзо.

Меџити исто така побара од Обвинителството побрза разрешница на случајот со Клиниката за онкологија. На новинарско прашање до каде се активностите околу позитивната листа на лекови, тој рече дека интензивно се работи на тоа. Тој рече дека како член на Владата, верува во системот на државата.

„Точно ќе ве известат службите, со точни бројки, по математика не сум многу добар и не би знаел точно да ви кажам како е, но службите ќе ве известат во текот на денот дека оваа информација не е така како што беше прикажана. Не е вистина, лекот е поевтин и точно ќе ви објаснат со дози, со дати, со месеци, како тоа се подразбира“, вели Фатмир Меџити.