Градот Скопје годинава повторно ќе добие новогодишни украси и организирана прослава на отворено. Новиот градоначалник Орце Ѓорѓиевски во гостување на МРТ 1 изјави дека во петок на седница на Советот ќе биде предложен ребаланс на буџетот, со кој ќе се обезбедат средства за новогодишното китење и за дочекот на 2026 година.
„Конечно Скопје ќе биде украсено онака како што треба, како што заслужуваат нашите граѓани. Во ребалансот предвидуваме средства за китење на главниот град и ќе биде организирана и прослава за пречек на Новата година“, рече Ѓорѓиевски.
Тој додаде дека во изминатите години не биле планирани средства за оваа намена, но дека новата градска администрација го коригира тоа.
Во врска со најавите за злоупотреби во јавните претпријатија, Ѓорѓиевски повтори дека околу 500 лица биле отстранети од списоците на вработени бидејќи земале плата без да одат на работа. Според градоначалникот, станува збор за годишна штета од приближно пет милиони евра.
„Стојам зад сите факти што ги изнесов. Овие лица нема да бидат заменети со нови, бидејќи единствената нивна улога била да вршат злоупотреба. Потребно е не само нивно отстранување, туку и одговорност за тие што им го овозможиле тоа“, истакна тој.
Ѓорѓиевски информираше дека веќе имале средби со Финансиската полиција и најави дека институциите ќе си ја завршат работата.
