Возбудливото дерби помеѓу Воска Спорт и Вардар заврши со скандал, откако охридскиот тим го напушти теренот во 75. минута, незадоволен од судењето. Натпреварот беше прекинат, а Вардар најверојатно ќе добие службени три бода.
Воска поведе уште во првото полувреме со голот на Осеи и долго ја одржуваше предноста. Но, контроверзија настана во 74. минута кога Вардар израмни – гол за кој домаќините тврдеа дека топката не ја минала гол-линијата. Силни протести следуваа веднаш по погодокот, но играта накратко продолжи.
Само минута подоцна, фудбалерите на Воска решија да го напуштат теренот, инсистирајќи дека натпреварот се води под неправедни услови. По кратко чекање и без нивно враќање на теренот, судијата го прекина натпреварот.
Според правилникот, доколку екипа одбие да го продолжи натпреварот, следува службена победа за противникот. Очекувано, Вардар ќе ги запише трите бода на табелата, додека Воска може да се соочи и со дополнителни санкции.
Во останатите натпревари од ПМФЛ: Струга и Гостивар одиграа 1:1, Тиквеш славеше над Академија Пандев со 2:1, Шкендија ја победи Беса во Тетово со 3:2, Работнички беше подобар од Пелистер со 2:1, а Силекс изненади со триумф над Шкупи – 1:2.
ИЗВОР: racin.mk
