Системот потфрли во случајот со четиринаесет месечното бебе кое почина на Детската клиника

Системот потфрли во случајот со четиринаесет месечното бебе кое почина на Детската клиника. Комисијата за стручен надзор, која ја иницираше министерот за здравство утврди системски, технички, но и стручни недостатоци во третманот на детето.

Според извештајот на комисијата, детската клиника направила превид кога детето било однесено по втор пат на преглед и не било задржано на болничко лекување.

„Од аспект на стручни забелешки, Комисијата за стручен надзор нотираше превид во проценката за потребата од хоспитализација при вториот преглед на бебето на Клиниката извршен на 03.10 годинава“… – рече Арбен Таравари министер за здравство.

Во клиниката Козле пак била направена ненавремена проценка за тежината на состојбата во која се наоѓало бебето. Исто така утврдено е дека во Козле немало ниту соодветната апаратура за пружање респираторна поддршка. Потфрлил и системот за транспорт на итни пациенти.

„Овдека стануваше збор дека и да го немале и едниот и другиот тип на механичка поддршка дали наверемено е направена проценката според тежината на респираторните потешкотии и детето е прерпратено на клиниката за детски болести од друга страна затајува системот за транспорт, бидејќи тој не функционира за време на вечерните саати или за 24 часовно дежурство“. – вели д-р Елизабета Петковска од Комисијата за стручен надзор.

„Токму оттука произлегуваат и нашите препораки за системските решенија односно клиничката болница Козле да се снабди со апаратура за неинвазивна и инвазивна вентилација која што е од животоспасувачко значење за децата“… – вели д-р Орхидеја Стомнароска од Комисијата за стручен надзор.

Во случајот со 31 годишната родилка пак не се утврдени пропусти.

„Не се утврдени суштински пропусти ниту кај гинеколошкиот тим во тек на перипарталниот третман на пациентката односно констатирано е дека тимот постапувал согласно упатствата“…. – рече Таравари.

Извештајот за бебето во кој се утврдени пропустите ќе бидат испратени и до Детската клиника и до Козле, но и во Лекарската комора која понатаму ќе одлучува какви мерки ќе се преземат.