Синдикатот на Македонската филхармонија изрази незадоволство од одлуката на министерот за култура и туризам, Зоран Љутков, кој го назначи Мустафа Имери за нов директор. Според нив, оваа одлука претставува уште еден пример за непочитување на законските процедури и продолжување на нетранспарентните практики при именувањето на раководни лица. Тие тврдат дека партиските договори се единствениот критериум при изборот, наместо стручноста и компетенциите.
Синдикатот нагласува дека министерот Љутков донел политичка, а не правно основана одлука, бидејќи Имери, според нив, не ги исполнува сите конкурсни услови. Вработените најавуваат дека ќе побараат правна одговорност за министерот, тврдејќи дека со ова именување продолжуваат старите, незаконски практики.
Во својата реакција, синдикатот истакнува дека нивната заложба е избор на директор врз основа на транспарентност и компетентност, независно од етничката припадност. Тие ги осудуваат сите националистички коментари во јавноста, нагласувајќи дека стручноста мора да биде единствениот критериум при ваквите именувања.
Според конкурсот, директорот на Филхармонија треба да има најмалку пет години работно искуство во културата, да биде истакнат културен работник со докажани референци, да приложи четиригодишна развојна програма и да поседува меѓународен сертификат за англиски јазик (B2).
Според достапните информации, тој бил професор-тенор и 15 години раководител на Катедрата на албански јазик во средното музичко училиште „Илија Николовски-Луј“. Завршил на ФМУ во Скопје, и е дипломиран соло-пејач. Во јавноста е познат кога лани, во февруари, на прес-конференција обвини дека бил разрешен бидејќи објавил фотографија со лидерот на Демократско движење Изет Меџити.
– Мустафа Имери не ги исполнува условите и неговото именување е незаконско. Ќе организираме протести сè додека оваа одлука не биде повлечена. Оваа власт продолжува да не ги почитува законите и системот – порачаа од Синдикатот.
И покрај актуелните случувања, тие ја информираа јавноста дека хуманитарниот концерт „Без зборови“, кој е закажан за утре, ќе се одржи како што е планирано, со цел да се соберат средства за жртвите од трагедијата во Кочани.
ИЗВОР: racin.mk
