По повод Меѓународниот ден на трудот, синдикатите во Србија организираат собири во Белград на кои ќе ги објават своите барања за измени во трудовото законодавство, а потоа ќе учествуваат на првомајскиот протест на студентите пред зградата на Владата на Србија.
Студентскиот протест почнува во 14 часот, а на нив ќе им се придружат Сојузот на независни синдикати на Србија, Обединетиот грански синдикат „Независност“, Здружението на слободни и независни синдикати (АСНС), Обединетите синдикати на Србија „Слога“ и Конфедерацијата на слободни синдикати.
На синдикалните собири ќе присуствуваат и студенти, кои заедно со членовите на синдикати ќе одбележат шест месеци од трагедијата, предизвикана од падот на бетонската настрешница на железничката станица во Нови Сад, со 16-минутен молк.
Најавено е дека на протестот пред Владата на Србија ќе присуствуваат синдикалци од Белград, Нови Сад, Ниш, Крагуевац и други градови.
На тој собир ќе се емитува „Слободен дневник“ подготвен од група новинари од Радио-телевизија Војводина, а ќе се одржи и концерт на отворено на детски рок хор.
Извор: 24vesti.mk
