реклама
Не стивнуваат реакциите во јавноста по објавувањето на документарецот во кој беа обелоденети информации за причината за пожарот во модуларната болница во Тетово во која животот го загубија 14 лица.
Поранешниот министер за здравство Беким Сали вели дека несреќата се случила поради голем број злоупотреби но и фаворизирање на компанијата Брако. Кога беше министер тој побарал ревизија на целиот проект, по што го раскинува договорот со компанијата на Кочо Анѓушев.
реклама
Но тврди дека актуелниот министер Фатмир Меџити сепак продолжил да и исплаќа пари на компанијата Брако. Која е обврската која оваа власт ја има кон Анѓушев и зошто се гази по жртвите од пожарот праша Сали.
„Со постапката која се одвиваше за пожарот на модуларната болница жртвите изгореа по втор пат а виновниците беа наградени. Мојот наследник и покрај препораките на внатрешната ревизија на Министерството за здравство во јули 2023 година преку Владата на Република Северна Македонија иницираше исплата на долгот кон компанијата Брако. Со други зборови еден од главните посочени виновници во емисијата „Убиство во Тетово“ е награден“, вели Беким Сали.
реклама
Ваквите обвинувања ги отфрла министерот Меџити преку соопштение што го објави Министерството за здравство уште вчера по големиот број реакции во јавноста.
„Министерството изготви информација до Влада од каде се чека одговор од неколку институции дали министерството треба да ги исплати трите направени амбуланти од планираните 10 со што би се избегнало плаќање на затезни камати и отштета. Оваа постапка не е завршена и Министерството самоиницијативно нема исплатено ниту денар за модуларните објекти“, велат од МЗ.
реклама
За случајот со модуларната болница се огласи и министерот за правда Кренар Лога.
„Мора да има и ќе има одговорност. Дефинитивно одговорност има и ќе има“, порача Кренар Лога.
За ВМРО-ДПМНЕ зачудува молкот за пропустите на Јавното обвинителство во случајот со модуларната болница во Тетово.
„Срамно е што одговорноста за смртта на 14 луѓе се сведе на две – три периферни лица во системот без прецизно утврдување на вистинска одговорност. До кога Јавното обвинителство ќе трепери пред олигархијата и луѓето од власта“, велат од ВМРО-ДПМНЕ.
Вчера од Јавното обвинителство ги отфрлија наводите во документарецот на ИРЛ за модуларната болница и велат дека се работи за очигледна неоснована дискредитација и се врши груба манипулација со информации.
реклама
