ИСЛАМАБАД (АА) – Силен земјотрес погоди делови од Пакистан и Индија, предизвикувајќи паника кај населението, пренесува Анадолу.
Индискиот национален центар за сеизмологија соопшти дека земјотресот со јачина од 5,4 степени според Рихтеровата скала е регистриран во 13 часот и 33 минути по локално време, а епицентарот бил во областа Дода во регионот Џаму и Кашмир под индиска управа.
Земјотресот што траеше неколку секунди, беше почувствуван и на северот на Индија, вклучувајќи го и главниот град Њу Делхи.
Засега нема известувања за штета.
Истиот потрес бил почувствуван и во неколку делови на соседен Пакистан, но тамошната сеизмичка управа измерила јачина од 5,6 степени според Рихтеровата скала.
„Земјотрес со јачина од 5,6 степени според Рихтеровата скала погоди делови на Пакистан, вклучително и Исламабад, северозападната провинција Хајбер Пахтунхва и северниот регион Гилгит Балтистан“, потврди за Анадолу официјален претставник од Националниот сеизмички центар за мониторинг.
Според официјални лица, земјотресот бил на длабочина од 10 километри, а епицентарот бил во источниот регион на Кашмир.
Извор: www.aa.com.tr
