ЖЕНЕВА (АА) – Швајцарија денес изрази жалење за одлуката на Русија да се повлече од Договорот за пренос на жито преку Црно Море и покрај напорите за посредување на Туркије, јавува Анадолу.
„Швајцарија жали за одлуката на Русија во врска со Црноморската иницијатива за жито и се надева на обновување во блиска иднина за да се обезбеди глобална безбедност на храната“, објави Министерството за надворешни работи на Твитер.
„Ги поздравуваме и ги поддржуваме неуморните напори на генералниот секретар на ОН, Антонио Гутереш, и на Туркије во овој поглед“, додаде Министерството.
Кремљ вчера објави дека го суспендирал Договорот велејќи дека рускиот дел од Договорот не бил спроведен.
Договорот, првично потпишан во јули минатата година во Истанбул од страна на Туркије, ОН, Русија и Украина, имаше цел да го продолжи извозот на жито од украинските пристаништа. Овој извоз беше запрен како резултат на руско-украинската војна што започна во февруари 2022 година.
Минатата година во Истанбул беше формиран Заеднички координативен центар со претставници од трите земји и ОН за да ги надгледуваат пратките.
Оттогаш Договорот беше обновуван неколку пати, а на 18 мај беше продолжен за уште два месеца.
Извор: www.aa.com.tr
