За два месеци, двајца европски државници во посета на Србија. После германскиот канцелар Олаф Шолц, и францускиот претседател Емануел Макрон пристигнува во Белград.
На маса се евроинтеграциите на Србија и односите со Косово но големо внимание се очекува да се посвети и на договорот за воените авиони кои Србија планира да ги купи од Франција.
„Тоа би било одлична работа за нас, бидејќи би значело огромно подобрување на борбената готовност и воената моќ на Србија…Веќе не е прашање на цена, станува збор за одредени гаранции. Но, она што е важно за нас е да разговараме со Макрон за многу важни прашања. Погледнете како е поделена посетата. Ќе разговараме за соработка во областа на иновациите, науката, технологијата, вештачката интелигенција и доаѓањето на нови француски инвеститори.“ – изјави Вучиќ.
Од Елисејската палата велат дека на Европската Унија и нејзините земји членки, им треба силна и моќна Србија. Во текстот објавен во Политико, Францускиот претседател порача дека и на Србија и треба силна и суверена Унија која ќе ги брани и промовира нејзините интереси…
„Како и Франција, убеден сум, Србија се стреми кон независност и суверенитет што може да ги обезбеди само ЕУ, поседувајќи ги средствата за својата стратешка автономија. Заедно ќе ја изградиме оваа стратешка автономија обезбедувајќи си средства кои треба да ја осигураат нашата безбедност и да ја зајакнат нашата одбранбена соработка.“ – изјави Макрон.
Посетата на Макрон на Белград се најде и во францускаите медиуми кои велат дека претседателот доаѓа специјално за да ја заврши продажбата на 12 борбени авиони Рафал на балканска држава која одржува пријателски врски со Русија.
Извор: 24vesti.mk
