Штипска Апелација одлучи, двајцата бивши градоначалници на Кочани, Николчо Илиев и Ратко Димитровски остануваат во куќен притвор. Тие се дел од осомничените во истрагата за пожарот во дискотеката на смртта во кој животот го загубија 59 лица, а речиси 200 се повредени.
“Жалбите изјавени од осомничениот Р.Д. од К. преку бранителот адвокат А. С. од К. и од Основниот јавен обвинител од Кочани, против решението на Основен суд Кочани КС-36/2025 од 24.03.2025 година во ст.1 со кое мерката притвор се заменува со мерка куќен притвор, – се отфрлаат како недозволени.“
По истекот на 30 дена од денешната одлука на Апелациониот Суд во Штип, доколку од страна на Јавното Обвинителство се побара продолжување на притворот на екс градоначалниците, тогаш ќе одлучува Кривичен Совет во Кочани составен од тројца судии, со тоа што донесената одлука постои можност да се обжали. Во меѓувреме, доколку осомничените пак, не ги почитуваат одредбите што се донесени за куќниот притвор, како што е на пример забраната за комуникација, во тој случај куќниот може да биде заменет со ефективен притвор и пред истекот на овие 30 дена.
Но, барањето од јавноста за транспарентна истрага и понатаму останува, а за ова се дебатираше и во 24 Анализа.
Во однос на истрагата, која се следи со огромен интерес во јавноста, во ефективен притвор засега останува актуелниот градоначалник на Кочани, Љупчо Папазов, кој по трагедијата поднесе оставка од функцијата, а во куќен притвор освен двајцата бивши градоначалници, Димитровски и Илијев, исто така останува и поранешната директорка на Државниот пазарен инспекторат, Анета Симеска-Димоска.
Инаку, вкупно 34 лица досега се осомничени за пожарот во Кочани, а не е искучена можноста оваа бројка да расте.
Извор: 24vesti.mk
