ОВИЕДО (АА) – Шпанскиот премиер Педро Санчез денес изјави дека „дошло време Европејците да зборуваат јасно и со еден глас“ за бруталните напади на Израел врз Појасот Газа, јавува Анадолу.
„Не затоа што светот гледа или затоа што историјата ќе ни суди, туку затоа што страдаат човечки суштества. Малите деца страдаат и ги губат своите животи“, рече Санчез во шпанскиот Парламент, ветувајќи дека Мадрид „нема да седи и да не прави ништо“.
Санчез истакна дека шпанските политичари ќе треба да ја преземат задачата да ја признаат државата Палестина во овој мандат, кој започна пред околу еден месец.
„Европа треба активно да придонесе во барањето конечно решение на конфликтот и да понуди сериозна перспектива за мир. Тоа подразбира признавање на палестинската држава што ќе живее во мир и безбедност заедно со израелската држава“, рече тој, осврнувајќи се и на неговиот став дека ЕУ како целина треба да ја признае државата Палестина.
За време на својот говор Санчез порача дека „бомбардирањата мора веднаш да престанат“ и дека хуманитарната помош мора да може да стигне до „луѓето што страдаат од студ, глад и болка“.
Осудувајќи ги нападите на Хамас и повикувајќи на ослободување на заложниците, тој ја повика Европа да побара од Израел да го почитува меѓународното право.
Сепак, некои политичари за време на парламентарната седница рекоа дека зборовите и постапките на Санчез не оделе доволно далеку.
Јоне Белара, претседателка на партијата Подемос, го повика Санчез да го користи зборот „геноцид“ кога се осврнува на израелските напади врз Газа. Зборувајќи за „илјадниците луѓе што се брутално истребени од страна на државата Израел“, Белара, исто така, Израел го нарече „закана за демократијата низ светот“.
Таа, исто така, ја повика Владата да ги прекине дипломатските врски и трговијата со оружје со Израел.
Критиките на Санчез кон Израел веќе го испровоцираа Тел Авив да го отповика својот амбасадор во Шпанија, но засега Шпанија одлучи да не го ескалира конфликтот и го остави својот амбасадор во Израел.
На парламентарната седница Санчез не одговори директно на повиците на Белара. Наместо тоа, портпаролот на социјалистите, Патси Лопез, го бранеше ставот на Шпанија за Израел.
