МОСКВА (АА) – Русија го задржува правото да употреби нуклеарно оружје како одговор на агресија од страна на западни земји, изјави денес секретарот на Советот за безбедност на Русија, Сергеј Шојгу, пренсува Анадолу.
Во интервјуто за државната новинска агенција ТАСС поранешниот министер за одбрана рече дека Москва внимателно го следи зголемувањето на военото присуство во европските земји.
„Во ноември 2024 година беа донесени измени во Основите на државната политика на Руската Федерација за нуклеарно одвраќање, со кои се потврдува дека Русија го задржува правото да употреби нуклеарно оружје во случај на агресија – било нуклеарна или конвенционална – кон неа или кон Република Белорусија“, објасни Шојгу.
Тој додаде дека според ажурираната Национална стратегија за безбедност, доколку странски држави преземат непријателски дејства што ги загрозуваат сувереноста или територијалниот интегритет на Русија, Москва може да одговори со симетрични или асиметрични мерки за да ги одврати тие дејства и да спречи нивно повторување.
Според него, нуклеарното одвраќање е насочено кон држави и воени сојузи што ја сметаат Русија за потенцијален противник и располагаат со оружје за масовно уништување или значајни конвенционални воени капацитети.
Овие мерки, како што нагласи, се однесуваат и на држави што ги отстапуваат својата територија и ресурси за подготовка или извршување агресија над Русија.
„Обврската за одржување на интегритетот на заедничкиот одбранбен простор на Русија и Белорусија, како и усогласеното спроведување мерки за стратегиско одвраќање, се кодифицирани во Концептот за безбедност на сојузната држава, усвоен во декември 2024 година, како и во Договорот за безбедносни гаранции меѓу Русија и Белорусија, развиен со активно учество на безбедносните совети на двете земји“, додаде тој.
Европската комисија во март ја претстави иницијативата „Повторно вооружување на Европа“, со цел значително инвестирање во одбранбените капацитети на земјите членки.
Извор: Anadolu Agency (AA)
