Трет пациент починал од западнонилска треска во Македонија, а бројот на лабораториски потврдени случаи се искачи на 35, соопштија денеска здравствените власти. Уште три лица се суспектни и кај нив дијагностиката е во тек.
Последниот смртен случај е 61-годишен пациент кој починал во текот на викендот. Тој имал сериозни придружни заболувања и бил од едно од подрачјата каде што е регистрирана зголемена активност на вирусот.
На Клиниката за инфективни болести во моментов се лекуваат 16 пациенти. Шестмина се во критична состојба и се згрижени на Одделот за интензивна нега.
Директорот на Клиниката, Фадил Цана, предупреди дека меѓу заразените веќе има и помлади пациенти. Најмладиот хоспитализиран пациент со невроинвазивна форма на болеста има 25 години, но неговата состојба е стабилна. Шесте пациенти во критична состојба се постари од 60 години.
Кај околу еден процент од заразените може да се развие тешка невроинвазивна форма, со висока температура, силна главоболка, закочен врат, дезориентираност и конфузност. Според Институтот за јавно здравје, најголемиот дел од инфекциите минуваат без симптоми, додека тешките форми може да доведат до воспаление на мозокот или мозочните обвивки.
Министерот за здравство Сашо Клековски изјави дека се утврдуваат местата каде што пациентите најверојатно биле заразени, бидејќи адресата на живеење не мора да биде и местото на инфекцијата. Инкубацискиот период трае од три до 14 дена, поради што се проверува каде се движеле пациентите во тој период.
Здравствените власти најавуваат засилено и таргетирано прскање против комарци од земја, особено околу местата со застоена вода и во подрачјата каде што се регистрирани случаи. Според Клековски, август и септември историски се периодот кога се очекува најголема активност на вирусот.
Епидемија на западнонилска треска претходно беше прогласена во повеќе делови од скопскиот регион, меѓу кои Кисела Вода, Гази Баба, Аеродром, Бутел и Илинден, како и во Драчево, Пржино, Долно Лисиче, Кадино и Јурумлери. На 11 август биле регистрирани 26 случаи, што значи дека бројот на потврдени инфекции продолжува да расте.
Здравствените власти апелираат граѓаните да користат средства против комарци, да носат облека што покрива поголем дел од телото во периодите кога комарците се најактивни и да ја отстрануваат застоената вода од дворовите и околината.
Извор: zurnal.mk
