РИМ (АА) – Италијанскиот заменик-премиер и министер за надворешни работи Антонио Тајани рече дека Европската Унија (ЕУ) треба сама да се реформира и дека не треба да се дозволи агендата на Блокот да ја одредуваат мал број влијателни држави, јавува Анадолу.
Тајани учествуваше на форумот Амбросети, кој секоја година се одржува во градот Чернобио, на брегот на езерото Комо во Италија, и по тој повод говореше за меѓународни прашања.
„Европа не би требало да ја водат две или три земји. Мора да се спроведат сите потребни реформи. Мора да го реформираме Пактот за стабилност и да се постигне заклучок во банкарската унија, да ги усогласиме нашите даночни системи“, рече Тајани.
Повикувајќи на усвојување индустриска политика на ниво на ЕУ, Тајани истакна дека Европа, за да биде почитувана сила, мора да има не само комерцијална, туку и економска моќ.
„Кон иднината ќе можеме да гледаме со оптимизам ако знаеме како да ја градиме надворешната политика и одбраната. За некои темелни преференции на Европа одлуките треба да се носат со мнозинство гласови наместо со едногласно гласање, инаку Европа би можела да остане блокирана. Лично сум за некои одлуки кои со мнозинство гласови ќе ја направат Европа поефикасна“, порача Тајани.
