Шеесеттина македонисти и слависти од 17 држави ќе бидат дел од 58. Летна школа на Меѓународниот семинар за македонски јазик, литература и култура при Универзитетот „Кирил и Методиј“ што од денеска до 28 август ќе се одржува во Охрид.
Семинаристи од универзитетските центри од Албанија, Англија, Бугарија, Италија, Полска, Народна Република Кина, Романија, Канада, Руската Федерација, Соединетите Американски Држави, Словенија, Србија, Турција, Унгарија, Франција, Хрватска и Чешката Република се во Охрид за да ги продлабочат своите познавања и проучувања за македонскиот јазик, литература и култура. Меѓу нив и универзитетски професори, значајни истражувачи од славистичкиот свет – лингвисти, книжевници и културолози и книжевни преведувачи, но и нови посветеници на македонистиката коишто искажуваат подготвеност да остварат влог во афирмацијата на македонскиот јазик, литература и култура во светот.
Претседателката Гордана Сиљановска-Давкова истакна дека луѓе од целиот свет се собрани тука во Охрид за да зборуваат македонски…
– Со македонистиката, македонскиот јазик и македонскиот идентитет се согласуваат или стануваат дел од нас многу филолози, лингвисти, македонисти…Во 21 век науката мора да се темели врз докази. Затоа го кренав Абеседарот и постојано велам, ако сто години има од Абецедарот печатен во Атина пред сто години, кој го побара и кој го доби тоа во Грција – Лигата на народите. Отворете го Абеседарот и прочитајте внатре – јасно е, рече таа.
Ректорката на УКИМ, Билјана Ангелова, рече дека македонскиот јазик е еден од 230 кодифицирани јазици на лингивистичката мапа на светот.
– Негирањето на македонскиот јазик е пред се проблем на оние кои го негираат. Тој постоел и постои…Со целиот свој научен потенцијал УКИМ бил и ќе биде поддршка на се она поврзано со македонскиот стандарден јазик. Со сите свои активности, со лекторатите, Меѓународниот семинар, со Меѓународната конференција, УКИМ јасно покажал дека стои и ќе стои зад се она што значи промоција на македонскиот јазик надвор од границите на нашата држава, рече таа.
За директорката на Семинарот, Кристина Николовска, лекторатите по македонски јазик, литература и култура на УКИМ претставаат институции од врвен национален и интернационален приоритет.
– Најголема потврда за македонскиот јазик е афирмацијата на македонистиката, домашна и странска, особено таа река од седум илјади македонисти низ светот што постојано се шири и афирмира и ги носи основните постулати на светиклиментовата Охридска книжевна школа… рече таа.
Семинаристите учесници на Школата со престојот во Охрид ќе можат на праизворите на сесловенската и македонската писменост и култура, да ги запознаат македонската книжевност, традиција и култура преку изучување на раскошниот македонски јазик, во срцето на древниот, вековен, прекрасен и фасцинантен град Охрид, град на УНЕСКО.
ИЗВОР: racin.mk
