Десеттина села во Охридско-струшкиот регион со години се соочуваат со несоодветен квалитет на водата за пиење. Станува збор за населени места чии што селски водоводи не се приклучени на градските водоводни мрежи, па со нив управуваат месните заедници. Главен проблем е нередовното хлорирање на водата.
„Не се способни под наводници да го одржуваат тој водоводен систем, односно постојано тој водоводен систем да испорачува безбедна вода за пиење. Затоа што најчесто во селата, кои имаат сопствен водовод, во Охрид, Струга и Дебар, недостасуваат финансиски средства за набавка на дезинфекционо средство за задолжително дезинфицирање на водата, односно хлорирање, за водата превентивно да не содржи патогени микро организми, односно да има резидејилен хлор, кој може да ги неутрализира овие патогени микро организми“, рече Сашо Точков-Центар за јавно здравје-Охрид.
Иако бројот на жители постајано се намалува, тоа не треба да биде причина водата во овие населени места да не се одржува како што треба, вели Точков.
„И еден човек и еден живот и едно здравје е многу важно и за тоа да се грижиме многу сериозно и многу поодговорно. Пијат нехлорирана вода“, додаде тој.
Од Центарот за јавно здравје велат дека половина од селата и во Охрид и Струга имаат сопствени водоводи и оти најдобро решение е истите да се приклучат на водоводите со кои управуваат јавните претпријатија. За тоа жителите треба да плаќаат соодветен надомест, но одбиваат.
„Во врска со комуникацијата на помалите претпријатија на територијата на Општина Струга и месните заедници, ние неколку пати сме контактирале за изнајдеме начин за соработка или нивното вклучување во нашиот систем, но не најдовме заеднички јазик“, рече Дашмир Насуфи-директор на Водовод-Струга.
За да се избегне појава на епидемии треба што побрзо да се најде решение./Алсат.мк
Мики Трајковски
Извор: alsat.mk
