Најновите тестирања на децата од четири до шест години во прилепските градинки покажуваат загрижувачки податоци: секое второ дете има потреба од логопедска поддршка. Тестирани се околу 500 деца, при што резултатите укажуваат на зголемување на случаи со говорни потешкотии, а сè почесто и на деца кои воопшто не зборуваат.
„Ситуацијата е алармантна,“ вели Даниела Пајмакоска Момироска, логопед во градинките „Наша иднина“ во Прилеп. „Најчесто станува збор за полиморфна дислалија, каде се заменуваат фонемите Р и Л, или за парасигматизам, каде звуците Ш и Ж се заменуваат со С и З. Во последно време, зачестени се случаи на алалија, целосно отсуство на говор, што бара итна интервенција од логопед и дефектолог,“ објаснува таа.
Според Пајмакоска Момироска, една од главните причини за ваквите проблеми е прекумерната изложеност на екрани и слабото комуницирање на родителите со децата. „Не можеме да дозволиме децата постојано да бидат пред телевизори, таблети и телефони. Комуникацијата меѓу родителот и детето мора да се засили,“ потенцира таа, советувајќи родителите секојдневно да разговараат со децата за нивниот ден и да одговараат на нивните прашања.
Родителите, како Габриела Стефаноска, чие дете има говорни потешкотии, ја нагласуваат важноста на овој проблем и потребата тој да не биде табу. „Моето дете има тешкотии со изговорот на неколку согласки. Работиме со логопед и во градинката и надвор од неа. Во групата на моето дете, 30 од 35 деца посетуваат логопед. Затоа, логопедската поддршка е нешто што топло го препорачувам,“ вели Стефаноска, охрабрувајќи ги и другите родители да побараат помош за своите деца.
ИЗВОР: racin.mk
