Филмскиот фестивал Синедејс синоќа во Скопје на отворањето на 23 издание постави нов рекорд во играње оро, кога повеќето од публиката се фатија да играат на крајот од концертот на данската група „Ефтеркланг“. Концертот следеше по документарецот „Ефтеркланг-Македониум бенд“ на Андреас Јонсен кој го отвори фестивалот.
Филмот, во кој скопскиот Младински културен центар (МКЦ) е копродуцент, всушност документира еден исклучителен процес на креативна соработка – тројцата членови на експерименталниот бенд од Копенхаген, Мадс Брауер, Каспер Клаусен и Расмус Столберг, лани во април дојдоа во Скопје со намера една недела во МКЦ да соработуваат со локални музичари кои дотогаш не ги познавале, а песните што ќе ги создадат да ги изведат на концерт пред споменикот Македониум во Крушево, еден од најпознатите македонски објекти во светот.
Повеќето од публиката се фатија на оро на крајот од концертот на „Ефтеркланг Македониум бенд“. (Фото: СДК.МК)
Музичарите ќе ги најдат на оглас – пејачката Дина Јашари, пијанистката и поетеса Ива Дамјановски која свири на тамарин вокс, тапанарката Мартина Баракоска, гитаристот Јане Трајковски, Женскиот младински хор при МКЦ, музичарот на народни инструменти Стефче Стојковски и скулпторот и музичар Дејан Спасовиќ, а сè во организација на продуцентот од МКЦ Владица Младеновски-Грга.
Највозбудливото во таа една недела интезивна музичка соработка е како творечкиот процес ги зближува луѓето од различни култури, традиции и јазици, или ко што вели еден стих на Ива Дамјановски – „јазиците да се бакнат“.
„Беше просто неверојатно искуство, да твориш со тотални странци, а на крајот да се чувствуваш како да сте најблиски пријатели. Мислам дека секој треба да направи такво нешто бар еднаш во животот“, рече на концертот пејачот Каспер Клаусен.
А режисерот, данскиот документарист Јонсен додаде: „Ние сите сега сме семејство Македониум“.
Филмот, што е прва продукција на МКЦ, почна без никаква најава исто како и концертот што почна буквално по одјавната шпица, на сцена пред филмското платно. Енергијата на блискост и заедништво од творечкиот процес забележан во документарецот експлодираше на концертот на кој беа изведени песните што беа создадени во таа соработка.
Извонреден концепт што го донесе најдоброто отворање на Синедејс досега.
Синедејс денеска продолжува со проекции во паркот МКЦ, каде ќе играат „Добрите момци одат во рајот“ на романскиот автор Раду Поткоава (од 20.55ч) и „Палас“на Роман Полански (22.30). Во киното Фросина играат „Највредниот товар“ на Мишел Хазанавициус (19.30) и „Екскурзија“ (22.30), дебито на босанската режисерка Уна Гуњак. Во летното кино на Кинотеката од 21.30 е „Семето на светата смоква“ на иранскиот режисер Мохамад Расулоф. Филмот доби специјална награда годинава во Кан, каде Расулоф дојде откако пребега од Иран во Европа по пресудата за казна од осум години затвор за снимање филмови и за потпишување изјави.
М. КОСТОВА
ИЗВОР: sdk.mk
