Во селото Бањска и понатаму се слушаат пукотници. Заменик-командирот на косовската полиција за северниот регион Ветон Ељшани за Коссев изјавил дека постојано се пука на сите страни и дека имаат работа со луѓе кои се тешко вооружани со блиндирани и оклопни возила
Косовскиот премиер Албин Курти на прес-конференција порача дека вооружената група луѓе кои утринава убија косовски полицаец и ранија уште еден се околу 30 на број и дека се опколени од косовската полиција и затоа им порача да се предадат. Тој објави и фотографии од лицата на кои се гледа дека имаат џипови и оклопни возила. За убиството, Курти го обвини официјален Белград, велејќи дека нападот е оркестриран од српската држава.
„Оваа ситуација не може да се толерира, тие дојдоа да се борат и да го дестабилизираат Косово, а ние се бориме против нив поради законот кој е наша одговорност. Мораме да го спроведеме законот, но најлесно и најбрзо би било да се предадат“,
рече Курти.
Од српската канцеларија за Косово и Метохија соопштија дека прес-конференцијата која требаше да ја одржи директорот на канцеларијата, Петар Петковиќ, е одложена, бидејќи свое вонредно обраќање попладнево ќе има претседателот на Србија, Александар Вучиќ. Оттаму кажаа дека Вучиќ ќе ги „разобличи сите лаги на Албин Курти“ кој воедно, како што велат, бил творецот на хаосот и пеколот за српскиот народ на Косово и Метохија.
Во меѓувреме, осуди за убиството доаѓаат од сите страни. Последни во низата фунцкионери кои го осудија настанот беа високиот претставник на Европската Унија за надворешна политика и безбедност, Жозеп Борел, кој побара виновниците да одговараат пред косовските закони.
Осуда пристигна и од специјалниот претставник на ЕУ за дијалогот помеѓу Косово и Србија, Мирослав Лајчак, кој според неофицијални информации се наоаѓа во Приштина.
Осуда пристигна и од македонскиот министер за надворешни работи и претседавач со ОБСЕ, Бујар Османи, го осуди убиството на полицискиот службеник на северот на Косово и побара темелна истрага и гонење на сите одговорни за овој чин на насилство. Тој порача дека стабилноста и безбедноста на Косово нема да бидат нарушени од акти на насилство и истакна дека безбедноста на граѓаните е најважна.
Косовската полиција претходно објави првични информации за синоќешното убиство на наредник од косовската полиција на северот на земјата. Според кажаното, полициската патрола, во која биле тројца полицајци од Звечан, дошла до селото Бањско бидејќи добила пријава дека таму се поставени два камиона кои го блокираат мостот на влезот од селото. Во моментот кога полициското возило пристигнало на влезот на селото, кон полицајците бил отворен оган. Локалните мештани кажуваат дека константно се слушале пукања и детонации, а ситуацијата се смирила утринава во 7 часот.
Осуда за настанот пристигна од американскиот амбасадор на Косово, Џеф Ховениер, кој кажа дека овие сторители на оркестрирани и насилни напади врз косовската полиција мора да бидат изнесени пред лицето на правдата.
„Косовската полиција има целосна и легитимна одговорност за спроведување на владеењето на правото на Косово. Сторителите мораат да бидат и ќе бидат повикани на одговорност и изведени пред лицето на правдата“,
напиша Ховениер.
Во меѓувреме, Рашко-призренската епархија преку соопштение изјави дека група вооружени и маскирани лица со блиндирано возило влегле во манастирот во селото Бањска, каде што утринава беше убиен припадник на косовската полиција, пренесуваат РТС и Н1.
Непознатите лица го скршиле катанецот од заклучената капија, а во самата внатрешност на манастирот се наоѓаат верници од Нови Сад, како и свештеникот, игуменот Данило и браќата во манастирот, се вели во соопштението на Рашко-призренската епархија.
„Поради безбедност, браќата од манастирот и верниците се заклучија во конаците, а заклучен е и храмот на манастирот. Вооружените лица се движат во дворот на манастирот и повремено се слуша пукање“,
се вели во соопштението.
ИЗВОР: 360stepeni.mk
