Легендарниот Бразилец Роберто Карлос, се огласи со официјално соопштение по операцијата на срцето. Еден од најдобрите леви бекови на сите времиња, познат по своите исклучително моќни удари и слободни удари, изјави дека процедурата била планирана и дека се чувствува добро.
„Би сакал да ги разјаснам информациите што кружат на интернет. Неодамна бев подложен на превентивна медицинска процедура, која ја планирав однапред со мојот медицински тим. Процедурата беше успешна и се чувствувам добро. Не добив срцев удар. Добро се опоравувам и со нетрпение очекувам да се вратам во целосна форма и да ги продолжам моите професионални и лични активности. Искрено им се заблагодарувам на сите за нивните пораки за поддршка, грижа и загриженост. Сакам да ги уверам сите дека нема причина за грижа“, изјави Роберто Карлос преку социјалните мрежи.
Тој ја заврши својата играчка кариера во 2016 година. Играше за Унион де Сао Жоао, Атлетико Минеиро, Палмеирас, Интер, Реал Мадрид, Фенербахче, Коринтијанс, Анжи Махачкала и Делхи Динамос.
Извор: vecer.mk
