Точно сто
години поминаа од првото појавување на цртаниот јунак и еден од најпознатите
ликови во детската книжевност – мечето Вини Пу, кој за првпат се појави во
кратката приказна „Погрешен вид пчели“, објавена на 24 декември 1925 година во
лондонскиот вечерен весник „London Evening News“.
Ликот брзо
стекна светска популарност, заедно со Тигарот, Кристофер Робин, играта „Пуови
стапчиња“ и измислената шума Акр 100, која во реалноста е шумата Ешдаун во
Источен Сасекс, каде што авторот Алан Александар Милн имал селска куќа,
наведува Би-би-си.
Големата
популарност на Мечето Пу и денес носи значителни приходи за тој регион, а
локалните власти издвоиле околу 450.000 фунти од јавни средства за финансирање
на програмата на настани по повод јубилејот.
Приказните
за Мечето Пу се сместени во шумата Ешдаун, која има статус на природна убавина
од особено значење.
Милн во 1925
година го купил имотот Кочфорд фарма, околу еден километар северно од шумата,
во близина на местото Хартфилд.
Книгата
„Вини Пу“, заснована на измислените авантури на Милновиот син Кристофер Робин и
неговото кадифено
мече, била објавена во 1926 година, додека продолжението „Куќата на аголот на
Пу“ излегло во 1928 година.
Објавени се
и две збирки поезија со истите ликови.
Оригиналниот
мост на кој Милн и неговиот син ја осмислиле играта „Пуови стапчиња“ кон крајот
на деведесеттите години станал дотраен и небезбеден, па бил отстранет и заменет
со реплика која и денес се наоѓа во шумата.
Оригиналната
конструкција била продадена на аукција во 2021 година за 131.000 фунти.
Популарноста
на Вини Пу дополнително пораснала откако компанијата Дизни во 1961 година ги
откупила правата за приказните.
Продавницата
за сувенири и чајџилницата „Пуовиот агол“, во близина на мостот во Хартфилд, е
отворена во 1978 година и е исполнета со спомени поврзани со овој лик.
Сопственикот
на локалот, Нил Рид, изјави дека е исклучително да се видат посетители од
целиот свет кои доаѓаат во мало англиско село за да ја одбележат годишнината на
Мечето Пу.
По повод
100. роденден на Мечето Пу, планирани се бројни манифестации, вклучувајќи
инсталација која центарот за посетители би го претворила во книга на
расклопување во природна големина, како и отворање нови пешачки патеки, со
заштита на чувствителните подрачја во шумата.
Извор: vecer.mk
