Се чекаат извештаите од надлежните институции во врска со случајот со четиригодишното дете од Струмица, кое минатата недела беше донесено на Детската клиника во Скопје неухрането и со рани по телото за да може Министерството за труд и социјална политика да преземе дополнителни чекори. Министерката Тренчевска верува дека ќе се подобри состојбата и дека детето ќе излезе од болница, но и дека никогаш повеќе нема да се повторат такви дејствија врз едно мало дете.
Од МВР тврдат дека досега нема ниту една пријава против таткото за семејно насилство. ТВ 24 пак вчера објави дека таткото на четиригодишното дете, во 2016-та бил пријавен за обид за убиство на сограѓанин, како и дека бил дел од тешки кражби и одземање на моторни возила. Меѓутоа, за какво дело таткото моментално издржува затворска казна, и уште колку време треба да ја издржува, како и дали му биле одобрувани викенд отсуства изминатиот период, се прашања на кои не добивме одговори, бидејќи институциите не откриваат детали, но неофицијално станува збор за дисфункционално семејство и доста конфузен случај.
Сепак, истрагата треба да покаже како живеело четиригодишното девојче, кое е доведено во состојба на неухранетост и дали повредите се последица од напад на куче, како што првично кажала мајката, или сепак се работи за нешто друго.
Извор: 24vesti.mk
