Од опозициската СДСМ експресно стигна демант на тврдењата на ВМРО ДПМНЕ и министерот за земјоделство, шумарство и водостопанство, Цветан Трипуновски, дека ‘оваа година е прва, во која се исплаќаат субвенции за тековната програма за директните плаќања, во висина од 70 милиони евра’.
Од опозициската партија им порачаа на ДПМНЕ и Трипуновски дека ‘срамно е да се фалат со туѓи мерки’ но, и дека уште посрамно е да лажат дека ‘ за првпат вовеле ваква исплата’. Од СДСМ велат дека „Годишната програма за исплата на субвенциите за 2024 година“ ја донесе Владата на СДСМ, во јануари годинава и затоа според нив Трипуновски и ВМРО-ДПМНЕ, ‘да не ги потценуваат земјоделците, бидејќи токму земјоделците знаат кога за прв пат добиле исплата на субвенции од тековна програма во тековната година’.
„Исплата на субвенциите е продолжување на процесот од минатата година, како една од мерките и систем на исплата донесен од Владата на СДСМ. Ова не е нов модел. За првпат според моделот за авансна исплата на субвенциите донесен од СДСМ е направена минатата година. Измената на програмата за авансна исплата на субвенциите и зголемувањето на буџетот за субвенции започна пред три години. Минатата година за првата година кога земјоделците добија авансна исплата на субвенциите во тековната година, за прв пат од 2005 година од кога се воведени субвенциите“, велат од СДСМ.
„Само во сточарството кај млечните крави ја зголемивме субвенцијата за оваа година од 4.000 денари на 12.000 по грло. Ова е вистинска грижа за земјоделците и долгорочна стратегија за развој на земјоделството.
уште еднаш покажаа тотоална безидејност кога е во прашање поддршката на земјоделството и земјоделците“, пишува во партиското соопштение.
Од СДСМ ги повикуваат ДПМНЕ и Труипуновски да не даваат лажни тврдења дека ‘се работи и за исплата на заостанати субвенции, бидејќи сите исплати се од тековната прграма за 2023 година и 2024 година’.
Вчера министерот Трипуновски, се пофали дека ‘Владата за 6 месеци го расчистила она што земјоделците го чекаа со години’.
„Исплатени се досега рекордни 70 милиони евра за субвенции, редовни, но и заостанати од минатите години. Обезбедени се околу 40 милиони евра потрошени за исполнување на обврските од претходните години. Во претходните два дена се исплатени 28 милиони евра за субвенции на 78 илјади земјоделци за тековната 2024 година. А поделени се субвенции за кравјо, овчо и козјо млеко, за обработлива земјоделска површина, за употреба на сертифициран семенски материјал, за одржување на постоечки овошни и лозови насади, за сточарско производство“, рече Трипуновски.
Според СДСМ со вакви информации Трипуновски, манипулира.
„Не се потрудивте да понудите ниту нова мерка, ниту зголемени субвенции. Доста им е на земјоделците од лаги и манипулации, потребни им се мерки и политики за да бидат профитабилни и конкурентни“, велат од СДСМ.
Министерот Трипуновски, најави дека во 2025 година, ќе продолжи и мерката „Здрава ужинка за секој ученик“ која ја започна Владата на СДСМ.
ИЗВОР: racin.mk
