Нов скандал во МВР е на повидок– нов случај на крајно сомнителен, коруптивен тендер којшто отвора сериозни прашања за злоупотреба на институциите за бизнис интереси и испумпување на парите на граѓаните, откри денеска на прес-конференција, Каја Шукова, потпретседателка на СДСМ.
Шукова излезе со детали што откриваат дека МВР, под раководство на министерот Панче Тошковски, доделил милионски тендер за лиценца за организирање на возачки испити во Пелагонискиот регион на новооснована фирма „Супер Возач“.
„Зад оваа фирма стои функционер на ВМРО-ДПМНЕ и советник во советот на Општина Кичево, Филип Митрески. Преку фирмата „Стрит рајд“ којашто е сопственик на „Супер возач“. Во пракса, ова значи дека МВР доделила монопол од 5 години врз доходовен бизнис вреден милиони денари – сите полагања на возачки испити во Битола, Прилеп и Ресен ќе одат преку оваа фирма блиска до власта“, истакна на прес конференцијата Каја Шукова.
Таа тврди дека скандалот е уште поголем, затоа што фирмата е регистрирана само три месеци пред распишувањето на тендерот за прв пат и праша: Дали однапред е договорена оваа милионска зделка?
„Како знаел дека за неколку месеци ќе се распише тендер па функционерот од ВМРО-ДПМНЕ отворил фирма токму за ова намена? Случајно? Не веруваме. Ова е пример за корупциски и тендерски шеми на ВМРО-ДПМНЕ. Партиски тендери по мерка на власта и ништо друго“, посочи потпретседателката на СДСМ Шукова.
Од СДСМ укажаа дека ова не е прв случај, кој доаѓа после скандалозниот тендер за униформите.
„Ова е уште еден случај на сомнителен коруптивен тендер во МВР. Основани се сомневањата дека МВР спроведува корупција во живо, наместо да се бори против криминалот и корупцијата. Ова е моделот на владеење на ВМРО-ДПМНЕ. Партиски и лични бизнис интереси врз грбот на народот. Ова е огромен скандал кој мора да биде расчистен до крај и да има одговорност“, рече Шукува и ја повика Државната комисија за спречување на корупцијата да отвори предмет и да постапи, а Основното јавно обвинителство да отвори предмет по допрен глас.
Шукова предупреди дека „институциите не може да бидат неми следачи туку мора да отворат постапки согласно своите надлежности“.
„Граѓаните заслужуваат институции што работат за нив, не за бизнисите на партиски советници. Македонија не смее да стане плен на организиран партиски грабеж кој го прави ВМРО-ДПМНЕ. Одговорност мора да има и ќе има“, наглас Шукова на прес конференцијата.
ИЗВОР: racin.mk
