За новите ценовни шокови со кои се соочуваат граѓаните, социјалдемократите велат дека се по мерка на маркетите и продавниците, се поради погрешната економска политика на Владта предводена од Христијан Мицкоски. Членката на Извршниот одбор на СДСМ, Лолита Ристова информира дека, по истекот на мерката за замрзнати маржи, цените на прехрамбенте производи, повторно драстично се покачени.
„Храната и производите кои и со замрзнатите маржи не беа достапни за граѓаните – денес се уште поскапи. Маслото за јадење е покачено од 89 на 92 денари, млекото над 72 денари, покачени се цените на јајцата, месото, сирењето, соковите. Средствата за хигиена поскапеа дури и за 60 проценти! Граѓаните имаат се помалку пари во своите џебови. Ова е резултат на трајно погрешна економска политика на владата“.
Ристова потсетува дека пропаднаа и т.н. есенска и новогодишната кошничка, но и дека пропаѓаат и замрзнатите маржи бидејќи цените продолжуваат да растат а стандардот и понатаму тоне.
„Животот во Македонија станува се поскап, граѓаните едвај врзуваат крај со крај, се мислат дали да платат сметки овој месец или да купат храна. Платите им се премали и не им стигнуваат ни до 15 ти во месецот. Синдикалната кошничка е покачена, за едно четиричлено семејство, потребни се најмалку 62.700 денари месечно. Ниту три минимални плати не го покриваат тој минимален износ. Додека граѓаните едвај врзуваат крај со крај, за функционерите од власта има богато мени од манго и папаја“, вели Ристова.
Според неа власта нема слух и одбива да ги покачи и минималната плата и платите на работниците воопшто.
„Не прифаќа ниту еден од предлозите на СДСМ за: укинување на ДДВ за основните производи, за минимална плата од 500 евра, за зголемување на платите во приватниот сектор. Одбива буквално сè што доаѓа од СДСМ. Оваа инает политика е на директна штета по стандардот на народот. Не може во најголемиот буџет нема пари за повисоки плати за работниците! Не може власта да троши 6,5 милијарди евра а да не сака да се откаже од ДДВ за храна“, вели таа.
Социјалдемократите бараат власта веднаш да се откаже од штетните економски политики и да ги прифати предлозите на СДСМ кои ќе значат вистинско намалување на цените и покачување на платите.
„Само со укинување на ДДВ за храна ќе се намалат цените на 250 производи. Тоа го бара народот и тоа го заслужува. Граѓаните заслужуваат достоинствен живот, стандард и држава што стои зад нив кога им е најтешко“, потенцира Ристова.
ИЗВОР: racin.mk
