Засилени подготовки на партиите за претстојните локални избори наесен.
Од СДСМ по вчерашната седница на Извршниот одбор објавија 19 кандидати кои ќе трчаат за општинските фотелји. Претседателот на партијата Венко Филипче изјави дека дел од нив се актуелни градоначалници како на пример за Центар, Крушево, Чучер Сандево, Берово, Росоман и Крива Паланка. Од СДСМ велат дека е одлучено во општините кои се сметаат за бастиони на ДУИ, тие нема да кандидираат свој, а ќе имаат само советнички листи.
-Одлучено е, со цел оптимизација на ресурсите и водени, како што кажав од претходните искуства да се посветиме целосно на советничките листи и секако дека, како што кажав, тоа е во координација со општинските организации, изјави Богданка Кузеска, портпаролка на СДСМ.
Свои кандидати, но и советнички листи подготвуваат и од ЗНАМ. Иако досега не објавиле ниту еден кандидат, извесно е дека претседателот на партијата Максим Димитриевски повторно ќе се кандидира за прв човек на Куманово, а најавија дека ќе имаат и кандидат за Центар. Од партијата веќе извесен период водат и преговори со владиниот партнер ВМРО-ДПМНЕ за тоа каде и во кој круг ќе имаат заедничка поддршка.
-Во тек се разговори со нашиот владин партнер и очекуваме тие разговори да завршат кон крајот на месецов. Разговараме за повеќе општини, вклучително, дефинирано е за Куманово, неколку општини во Скопје и повеќе општини што се помали низ цела држава. Таму каде што ќе имаме кандидат за градоначалник ЗНАМ тој ќе биде во договор со владиниот партнер ВМРО-ДПМНЕ поддржан од нивна страна и тие нема да имаат кандидат во тие општини, изјави Никола Мемов, портпарол на ЗНАМ.
Од ВМРО-ДПМНЕ веќе објавија дел од своите кандидати, додека за Град Скопје велат дека ќе биде познат во средината на јули. За оваа позиција се уште се кршат копјата околу тоа дали во трката за градскиот татко ќе биде актуелниот градоначалник на Кисела Вода Орце Ѓорѓиевски или министерот за локална самоуправа Златко Перински.
ИЗВОР: ТВ 21
