АНКАРА (АА) – По изјавите на ирачките официјални претставници дека „присуството на коалициските сили предводени од САД во земјата ќе биде прекинато“, се огласи Министерството за одбрана на Соединетите Американски Држави (Пентагон) со порака дека не планира да ги повлече своите трупи од таа земја, јавува Анадолу.
Портпаролот на Пентагон, бригадниот генерал Патрик Рајдер, одговараше на прашања на новинарите на дневната прес-конференција.
„Не сум запознат со никакви планови (за повлекување) во овој момент“, рече Рајдер, додавајќи дека остануваат фокусирани на мисиите на заедничката оперативна група „Непоколеблива решителност“, која беше формирана како дел од борбата против ДЕАШ.
Рајдер истакна дека во регионот дејствуваат на покана на ирачката Влада.
Абу Таква ал-Саиди, еден од водачите на Движењето Нуџеба, шиитска милиција поврзана со единиците Хашд ал-Шааб, блиски до Иран, убиен е во американски воздушен напад во Багдад на 4 јануари.
Ирачката Влада смета дека за нападот е одговорна коалицијата против терористичката организација ДЕАШ предводена од САД.
Ирачкиот премиер Мухамед Шија ал-Судани, во својата изјава на 5 јануари, го осуди американскиот напад врз седиштето на Хашд ал Шааби во Багдад и рече: „Како Влада, ние сме во процес на формирање билатерална комисија за целосно ставање крај на постоењето на коалициските сили.“
Извор: Anadolu Agency (AA)
