ИСТАНБУЛ (АА) – Руски гувернер изјави дека вкупно 611 парчиња муниција биле испукани од украинската Армија врз областа Шебекински во регионот Белгород во земјата, пренесува Анадолу.
„Во урбаното подрачје Шебекински беа истрелани 611 единици разновидна муниција… Во градот Шебекино има голем број оштетувања на централниот пазар, трговските објекти и индустриското претпријатие. Бројот на уништени и оштетени домаќинства и автомобили се прецизира“, изјави гувернерот на Белгород, Вјачеслав Гладков, на Телеграм.
Гладков потоа изјави дека гранатирањето на областа било извршено со помош на повеќецевни ракетни системи „Град“, минофрлачи и топовска артилерија, наведувајќи дека украинските диверзантско-извидувачки сили влегле во областа, но биле запрени додека се обидувале да ги преминат реките во близина на селото Новаја Таволжанка.
Гладков, исто така рече дека имало гранатирање во областите Белгородски, Борисовски, Валујски, Волоконовски и Грајворонски во Белгород.
Во соопштението на Телеграм објавено синоќа, тој рече дека енергетскиот објект во регионот гори, истакнувајќи дека нема жртви или пречки во потрошувачката на електрична енергија.
„Прелиминарната причина за пожарот е фрлена експлозивна направа од беспилотно летало. Службите за итни случаи се на самото место“, додаде тој.
Во меѓувреме, Михаило Подољак, советник на украинскиот Претседателски кабинет, на Твитер објави дека настаните во Шебекино треба да се гледаат како „иднината на Русија“.
„Во примерот на еден мал град, го гледаме крајот на ерата на ‘стабилноста на Путин‘“, изјави Подољак.
Вооружените сили на Украина, според наводите, извршиле серија напади врз пограничните региони на Русија во последниве месеци, особено врз Брајанск и Белгород, кои беа погодени со беспилотни летала и артилерија.
Извор: www.aa.com.tr
