ИСТАНБУЛ (АА) – Русија денеска ја обвини Украина дека подготвува „оружена провокација“ против Транснистрија (Приднестровје), непризнат отцепен регион, меѓународно признат како дел од Молдавија, пренесува Анадолу.
„Според достапните информации, во блиска иднина, режимот на Киев подготвува оружена провокација против Приднестровската Молдавска Република (Транснистрија), која ќе ја изведат единиците на Вооружените сили на Украина, со учество на националистичката формација „Азов““, се вели во соопштението на руското Министерство за одбрана објавено на Телеграм.
Во соопштението се тврди дека се планира офанзива против руските војници во отцепениот регион, при што украинските сили наводно ќе бидат облечени во униформи на Руските вооружени сили.
„Руското Министерство за одбрана внимателно ја следи ситуацијата на границата на Украина со Приднестровската Молдавска Република и е подготвено да одговори на секоја промена на ситуацијата“, се додава во соопштението.
Во меѓувреме, молдавската Влада преку соопштение истакна дека властите не ги потврдуваат тврдењата на руското Министерство за одбрана.
„Повикуваме на смиреност и добивање информации од официјални и доверливи извори на Република Молдавија. Нашите сектори соработуваат со странски партнери, а во случај на закана за земјата, јавноста веднаш ќе биде информирана“, се вели во соопштението објавено на Телеграм.
Кремљ во понеделникот ги нарече актуелните односи меѓу Русија и Молдавија „многу напнати“ поради фокусот на Кишињев „на сè што е антируско“, при полагање заклетва на новата Влада на Молдавија, предводена од прозападниот економист Дорин Ресин.
Молдавскиот министер за надворешни работи, Нику Попеску, во интервју за локалните медиуми доцна синоќа изјави дека земјата ќе започне да ги критикува договорите со Заедницата на независни држави поради целта на Кишињев за европска интеграција.
Заедницата на независни држави е регионална организација формирана по распадот на Советскиот Сојуз во 1991 година од неговите поранешни членки за поттикнување на соработката за економските, политичките и безбедносните прашања.
Извор: www.aa.com.tr
