Жените не се подеднакво конкуретни на пазарот на труд. За работа на исти позиции, жените работнички добиваат околу 19% пониска плата од мажите, а кога се во прашање раководните позиции, разликата е уште подрастична.
Стереотипите, културата, традицијата и верата се главни предизвици кои стојат на патот на жените кон кариерниот успех и правична исплата за својот труд. Ова се дел од заклучоците на дебатата на Женскиот економски форум – Балкан 2024.
Македонија предничи во Европа по застапеност на жените во банкарскиот систем, со 20 -30 отсто и во ИТ секторот, со 30-40 проценти. Најдобро е кога се цени квалитетот, вели Ленка Угриновска, но единствен начин да се превземе приматот од мажите е да се воведат системски мерки кои ќе го зголемат присуството на жените на раководни позиции од 40 до 50 отсто. Во земјава законски е регулирана родовата застепеност во политиката.
Во Македонија, јазот во вработеноста меѓу мажите и жените е речиси двојно поголем од оној во ЕУ, додека родовиот јаз во стапката на активност е 24 процентни поени во корист на мажите. Според извештајот за Македонија на меѓународната трудова организација, родово-базираната дискриминација на работа ги погодува жените повеќе од мажите и е позачестена во приватниот сектор.
Извор: 24vesti.mk
