Недостаток на евиденција за примени, потрошени и донирани лекови за ретки болести како и несоодветна примена на законот за јавни набавки како и нехронолошка исплата на преземените обврски се дел од недостатоците констатирани во извештаите на ревизорите за клиниката за хематологија за 2023 година.
Според извештајот, во текот на 2023 година на Клиниката се примени лекови во износ од 231.249 илјади денари, за кои не се воспоставени евиденции со кои ќе се обезбеди согледување за состојбата и движењето на истите.
– Извршен е прием на лекови во износ од 188.265 илјади денари кои во име и за сметка на Клиниката ги набавиле Министерството и Агенцијата за лекови и медицински средства. За приемот и издавањето на овие лекови не е воспоставена финансиска евиденција, односно се води само материјална евиденција без вредносни показатели. Извршен е прием на лекови и потрошни материјали од донации во износ од 42.984 илјади денари, за кои се води само помошна/рачна евиденција
За реализацијата на постапките за јавни набавки од ДЗР велат дека извршена е ревизија на 8 постапки за јавни набавки со кои се опфатени 95 отсто од преземените обврски а констатирани се неколку недоследности.
– Во текот на 2022 и 2023 година спроведени се две постапки за јавни набавки на услуги за занаетчиски работи на Клиниката и склучени се договори во износ од 21.240 илјади денари. Со увид во документацијата на постапките, ревизијата констатира дека предметот на јавната набавка не е прецизно дефиниран, односно не e направена предмер пресметка и не се специфицирани конкретни работи/позиции, како и обем/количини на работите кои ќе се изведуваат.
Од ДЗР велат дека со ревизијата е опфатен и процесот на спроведување на препораките дадени во конечниот извештај на овластениот државен ревизор за 2017 година. Во овој дел утвредно е дека од од дадените пет препораки, три се спроведени, една е делумно додека една препорака не е спроведена воопшто.
Во новиот извештај пак, од ревизија повторно даваат препораки со цел преземање на мерки и активности од надлежните лица и органи.
Извор: 24vesti.mk
