Партиски препукувања за новогодишната кошничка. За едните таа е измама и нема никакво намалување на цените во малопродажбата, додека за другите, тоа е реалност и видливи биле намалените зени на околу 1000 производи кои се опфатени со кошничката.
СДСМ обвинува дека, наместо реални мерки за подобар живот за граѓаните, владата на чело со Мицкоски им овозможила на трговците да се богатат на грбот на граѓаните. Од помпезно најавуваната есенска кошничка добивме само раст на инфлацијата во месец ноември од 4,3%, велат од СДСМ.
–Мицкоски најави и новогодишна кошничка со наводно пониски цени на прехранбените производи, но по истиот модел, откако ја најави, тој им остави време на трговците да ги зголемат цените. Очигледно е дека за новогодишните празници, кошничките на граѓаните ќе останат празни, а полни ќе бидат само касите на трговците, изјави Кристина Костова, потпретседателка на СДСМ.
СДС го покачи ДДВ за прехранбени производи и убедуваше дека чипсот е нездрав и луксузен продукт, а со Новогодишната кошничка за прв пат се опфатени 1000 производи, се вели во реакцијата на ВМРО-ДПМНЕ, на прес конференцијата на Костова. Од владејачката партија додаваат дека за разлика од нив, Владата предводена од ВМРО-ДПМНЕ презема конкретни мерки за раздвижување на економијата.
Од ВМРО-ДПМНЕ воедно обвинија дека за време на владеењето на СДСМ, 500 илјади македонски граѓани биле оставени на раб на сиромаштија кои денот го поминувале со 150 денари, пензионерите протестирале пред влада со празни тегли, бидејќи како што велат, пензиите кои што им ги даваше владата на СДС не им стигаа дури ниту за зимница да си направат.
ИЗВОР: ТВ 21
