Власта очекува процедурата за разрешување на државниот обвинител Љупчо Коцевски да трае со недели. Оттаму претходно истакна дека тој како државен обвинител е одговорен за неефикасноста во предметите, но и дека незаконски назначил прв човек на Вишото обвинителство. Неодамна премиерот Христијан Мицкоски кажа дека Коцевски имал време да се покаже, а од опозицијата обвинија за упад на власта во правосудниот систем.
„Ова што го гледаме што го прави власта е дефинитивно една груба партизација и затоа повикуваме да се тргнат рацете на политиката токму од правосудството и да се видат сериозни чекори дека се работи на сериозни реформи во однос на судството“, изјави Богданка Кузеска од СДСМ.
Од власта одговорија дека опозицијата го брани корумпираното правосудство, зашто тоа им овозможувало да не одговараат за криминалите.
„Потребни се реални реформи во судството и обвинителството. Со кадрите на СДС и ДУИ во судството и обвинителството, кои чекаат да дојде предмет против нивните шефови за да го отфрлат или закочат не се гради доверба во судството и обвинителството“, изјави Миле Лефков од ВМРО-ДПМНЕ.
Предлогот за разрешување треба да биде испратен во Советот на јавни обвинители, од каде истакнаа дека ќе дадат мислење во рокот од 15 дена. Коцевски пак изјави дека сам ќе си даде оставка ако се утврди дека направил тешка дисциплинска повреда, но тврди дека работел законски. Државниот обвинител се разрешува со 61 глас во Собранието. Засега владините претставници велат дека не зборуваат за името за наследник на Коцевски на функцијата, туку дека очекуваат тој да е бескомпромисен борец против криминалот.
ИЗВОР: ТВ 21
