Израелското разузнавање користело компанија за да достави комуникациски уреди наместени со експлозиви до милитантната група Хезболах, што доведе до смртоносниот напад оваа недела, објави Њујорк Тајмс.
Илјадници луѓе беа повредени, а повеќе од 30 загинаа, меѓу кои четири деца, во вторникот и средата, откако пејџери, воки токи и други рачни уреди што ги користеа оперативците на Хезболах истовремено експлодираа во напад без преседан во Либан. Израел ниту ја потврди, ниту ја отфрли одговорноста за операцијата. Според Њујорк Тајмс, испораките започнале во летото 2022 година во мал број и брзо ескалирале по февруари, кога лидерот на Хезболах, Хасан Насралах, ја натерал организацијата да се откаже од мобилните телефони. Тој одговараше на серијата насочени убиства на водачите на неговото движење, велејќи им на поддржувачите дека посовремените комуникациски уреди се ранливи на израелските сајбер операции.
За Хезболах, пејџерите биле одбранбена мерка, но во Израел, разузнавачите ги нарекуваа пејџерите како „копчиња“ што може да се притиснат кога ќе дојде време“, пишува весникот. Поранешна шефица на истражување и анализа на израелската разузнавачка агенција Мосад Сима Шајн вели дека нападот врз оперативците на Хезболах со помош на пејџери успеа совршено.
Изјава Сима Шајн, поранешен шеф на истражување и анализа на израелската разузнавачка агенција Мосад – Разузнавањето, технологијата и оперативните способности, комбинацијата на тие три фактори ја направи оваа операција успешна. Мислам дека кога ќе го видите големиот број повредени, ќе сфатите дека операцијата била многу прецизна и дека целта била само оперативци на Хезболах, а не цивили. Жал ми е за она што се случи во двата случаја на смрт на деца, но тоа не беше целта.
Генералниот директор на либанската цивилна авијација Фади ел-Хасан издаде директива со која им се забранува на патниците да носат пејџери и воки-токи во кој било авион. Турција пак го обвини Израел дека сака да ја прошири војната од Појасот Газа до Либан. Турскиот министер за надворешни работи Хакан Фидан изјави дека „ескалацијата во регионот е алармантна“.
Извор: 24vesti.mk
