Застрашувачки снимки доаѓаат од поплавите во Шпанија предизвикани од поројните дождови со катастрофални последици и со биланс кој се искачи на најмалку100 загинати лица. Станува збор за едни од најголемите поплави во земјата во последните три децении.
Се зголемуваат обвинувањата дека во многу случаи службите за помош при катастрофи реагирале премногу бавно кога станува збор за предупредувањата, што значи дека луѓето немале време да се тргнат од патиштата или да стигнат до повисоките места. Преживеани раскажуваат за потресни искуства.
„Работев на една бензинска пумпа, во Мансанаси кога надојде водата. Вратите се искршија и водата беше длабока два метра. Останав на врвот на објектот“.
Околу 115 илјади домаќинства останаа без струја, а имаше и проблеми со мрежата за мобилна телефонија. Околу 1.200 луѓе повеќе од 24 часа беа заглавени во своите возила. Ситуацијата е критична, особено во провинцијата Албасете, каде спасувачките екипи интензивно трагаат по исчезнати лица.
„Има исчезнати, не се знае колку, се помали се шансите да се живи, но не губиме надеж.“ – Хозе Антонио Филипе – спасувач.
Премиерот Педро Санчез прогласи тридневна национална жалост, поттикнувајќи единство и солидарност.
„Цела Шпанија е со Вас. Наш апсолутен приоритет е да ви помогнеме. Јавните установи работат и ние сме во координација со нив.за да можеме да овозможиме и да пружиме секакви можни средства.“ – рече Санчез.
Властите предупредуваат на продолжување на лошите временски услови и им советуваат на граѓаните да се воздржат од патувања во погодените области. Поради поплавите има блокади на патиштата. Владата ги затвори училиштата во погодените подрачја низ јужна Шпанија од Малага до Валенсија. Повеќе стотици војници се распоредени за помош во погодените подрачја.
Извор: 24vesti.mk
